Қазақстан мен Түркия біліктіліктер саласындағы ынтымақтастықты нығайтуда: VQA делегациясы «Еңбек ресурстарын дамыту орталығы» АҚ-дағы жұмыс сапарын жалғастыруда
2026 жылғы 8–9 сәуірде «Еңбек ресурстарын дамыту орталығы» АҚ-да Түркия Республикасының Кәсіптік біліктіліктер жөніндегі органының (VQA) делегациясының жұмыс сапары жалғасын тапты. Негізгі мақсат — біліктіліктер жүйесін зерделеу және екіжақты ынтымақтастықты дамыту.
Бағдарлама барысында қонақтар Қазақстанның Ұлттық біліктілік жүйесімен: негізгі құралдарымен, кәсіптік біліктіліктерді тану рәсімімен және Career Enbek цифрлық платформасымен танысты. Түрік тарапы өздерінің біліктілік жүйесін және оларды тану тәртібін таныстырды.
Түркияның Кәсіптік біліктіліктер басқармасы төрағасының орынбасары Угур Тунч: «Қазақстан мен Түркия кәсіптік біліктіліктер саласындағы әріптестікті жаңа деңгейге көтеруде. Біз кадрларды сертификаттау тетіктерін және кәсіптік стандарттарды енгізу тәжірибесін зерделедік, бұл түркі әлемінің бірыңғай біліктілік кеңістігін қалыптастыруға мүмкіндік береді», — деп атап өтті.
«Еңбек ресурстарын дамыту орталығы» АҚ басқарушы директоры Ернат Жүнісов: «Сапардың негізгі мақсаты — тәжірибе алмасу және елдеріміз арасындағы ынтымақтастықты дамыту. Біз өзара іс-қимылдың негізгі бағыттарын пысықтадық және түрік тәжірибесінің озық үлгілерін өз тәжірибемізде қолдануды жоспарлап отырмыз», — деп толықтырды.
Делегация теміржол көлігі саласының персоналын бағалау және дамыту орталығына барып, сала қызметкерлерін сертификаттау үдерісімен танысты, сондай-ақ Астана қаласы әкімдігінің Технологиялық колледжінде болып, білім беру бағдарламаларына кәсіптік стандарттарды енгізу тәжірибесімен алмасты.
Сондай-ақ «KAZENERGY» қауымдастығына және «Атамекен» ҰКП-ға сапарлар ұйымдастырылды. Мұнда мұнай-газ саласындағы кәсіптік біліктіліктер жөніндегі салалық кеңестің жұмысы, кәсіптік стандарттарды әзірлеу, біліктіліктерді тану орталықтарын аккредиттеу және бизнеспен біліктілік жүйесін дамытудағы рөлі мәселелері талқыланды.
Үш күндік сапар қорытындысы бойынша тараптар ынтымақтастықтың маңыздылығын атап өтіп, оны одан әрі дамытуға мүдделілік білдірді.