Әлеуметтік қызметкерлерді аттестаттауға өтініш беру: «Career Enbek» ҰБЖ цифрлық платформасында
Қазақстан Республикасы Еңбек және халықты әлеуметтік қорғау министрлігінің тапсырмаларын іске асыру аясында «Еңбек ресурстарын дамыту орталығы» АҚ «Career Enbek» Ұлттық біліктілік жүйесінің цифрлық платформасында әлеуметтік қызметкерлерді аттестаттаудан өткізуге өтініш беру бойынша онлайн сервисті енгізді.
Сервис әлеуметтік қызметкерлерге мемлекеттік ақпараттық жүйелерден деректерді автоматты түрде толтыру арқылы жеке кабинет арқылы өтінім беруге, қажетті құжаттарды тіркеуге және өтінімнің қаралу мәртебесін онлайн режимде қадағалауға мүмкіндік береді.
Уәкілетті органдар үшін өтінімдерді қарау, аттестаттауды өткізу күні мен орнын тағайындау, сондай-ақ комиссия отырысының электрондық хаттамасын қалыптастыру құралдары іске асырылды. Барлық кезеңдер электрондық цифрлық қолтаңбаны қолданумен сүйемелденеді, бұл қабылданатын шешімдердің заңды маңыздылығын қамтамасыз етеді.
Аттестаттаудан өту қорытындысы бойынша жүйе түпнұсқалығын тексеруге арналған бірегей сериялық нөмірі мен QR-коды бар куәлікті автоматты түрде қалыптастырады.
Цифрлық сервисті енгізу рәсімнің ашықтығын қамтамасыз етуге, өтінімдерді қарау мерзімдерін қысқартуға, процесс қатысушыларына түсетін әкімшілік жүктемені азайтуға және шешім қабылдаудың объективтілігін арттыруға мүмкіндік береді.
«Аттестаттау процесін цифрландыру рәсімді әлеуметтік қызметкерлер мен мемлекеттік органдар үшін барынша ашық әрі ыңғайлы етуге, сондай-ақ біліктілікті бағалаудың бірыңғай стандартын қамтамасыз етуге мүмкіндік береді», – деп атап өтті «Еңбек ресурстарын дамыту орталығы» АҚ басқарушы директоры Ернат Жүнісов.
Жоба Қазақстан Республикасы Еңбек және халықты әлеуметтік қорғау министрлігі мен «Еңбек ресурстарын дамыту орталығы» АҚ қатысуымен іске асырылды.