«Еңбек ресурстарын дамыту орталығы» АҚ 2026 жылғы 20 шілдеден 03 тамызға дейін кәсіптік стандарттарды әзірлеуге арналған ЖИ-конфигураторын пайдалану бойынша онлайн-оқыту өткізеді.
Құрылған цифрлық сервис жасанды интеллект технологияларын қолдана отырып, кәсіптік стандарттарды әзірлеуге және өзектендіруге арналған инновациялық құрал болып табылады.
ЖИ-конфигураторын пайдалану кәсіптік стандарт мазмұнының 80%-на дейін автоматты түрде қалыптастыруға, қолмен орындалатын жұмыстар көлемін айтарлықтай азайтуға және құжатты дайындау мерзімін бірнеше айдан 1–2 күнге дейін қысқартуға мүмкіндік береді. Сонымен қатар, сервис құжат жобаларын мемлекеттік және орыс тілдерінде қатар қалыптастыруды қамтамасыз етеді.
Сервистің функционалдық мүмкіндіктері кәсіптік стандарт бөлімдерін: еңбек функцияларын, дағдыларды, біліктер мен білімдерді талдау және автоматты түрде қалыптастыруды, ұлттық жіктеуіштер (ЭҚЖЖ, ҰКЖ) мен біліктілік шеңберлерінің деректерін салыстыруды, сондай-ақ қазақстандық және халықаралық дереккөздерден алынған ақпараттарды пайдалануды қамтиды.
Оқытуға 21 мемлекеттік органның өкілдері, салалық біліктілік жөніндегі кеңестердің төрағалары мен мүшелері, сондай-ақ кәсіптік стандарттарды әзірлеушілер тартылды.
Оқыту барысында қатысушылар Конфигуратордың функционалдық мүмкіндіктерімен танысып, оны пайдалану бойынша кезең-кезеңімен практикалық ұсынымдар алады және оның құралдары арқылы кәсіптік стандарттарды әзірлеу мен өзектендіру тәртібін меңгереді.
Оқыту семинарларының кестесі Career Enbek цифрлық платформасындағы «Сарапшы» → «ҰБЖ оқыту» бөлімінде орналастырылған.
