2026 жылғы 31 шілдеде Ұлттық біліктілік жүйесі мәселелері жөніндегі Сараптамалық кеңестің отырысы өтіп, онда біліктілік жүйесінде жасанды интеллект технологияларын қолдану екі бағыт бойынша талқыланды.
Бірінші мәселе аясында сарапшыларға Career Enbek цифрлық платформасында кәсіптік стандарттарды әзірлеуге арналған ЖИ-конфигураторы таныстырылды. Сарапшылар ұсынылған құралды оң бағалап, оның өзектілігін, практикалық маңызын, сондай-ақ кәсіптік стандарттарды әзірлеу үдерісін едәуір жеңілдетуге және құжаттарды дайындау мерзімдерін қысқартуға мүмкіндік беретінін атап өтті.
Сондай-ақ сарапшылардың ұсыныстары ескеріліп жетілдірілген, білім беру бағдарламаларын әзірлеу кезінде кәсіптік стандарттарды пайдалануға мониторинг жүргізу әдістемесінің жобасы қаралды. Онда білім беру бағдарламаларында жасанды интеллект технологияларын қолдану мәселелерінің көрініс табуы мәселесіне ерекше назар аударылды.
Талқылау қорытындысы бойынша Сараптамалық кеңес мүшелері аталған әдістемені іске асыру жүйелі мониторингті қамтамасыз етіп қана қоймай, еңбек нарығы мен білім беру жүйесі арасындағы тиімді кері байланыс тетігін қалыптастыруға мүмкіндік беретінін атап өтті. Мониторингтің жеделдігін, объективтілігін және тиімділігін арттыру құралы ретінде ЖИ технологияларын қолдануға ерекше назар аударылды.
Сараптамалық кеңес әдістеме жобасын одан әрі пысықтауды қолдады. Айтылған ұсынымдарды ескере отырып, құжат жетілдірілетін болады.
Отырысқа қатысушылар дәстүрлі анықтамалықтардан (ЕТКС, КС, ТКХ, ТКХД) кәсіптік стандарттарға көшу жөніндегі практикалық кейстерді талқылауға да ерекше назар аударды. Талқылау барысында осы үдерісті іске асырудың практикалық аспектілері мен ықтимал тәсілдері жан-жақты қарастырылды.
