Микробіліктіліктерді әзірлеу және енгізу бойынша еуропалық тәжірибе жұмыс кездесуі барысында таныстырылды

«Еңбек ресурстарын дамыту орталығы» АҚ Еуропалық білім беру қорымен (ETF) бірлесіп, біліктілік жүйесіндегі микробіліктіліктерді әзірлеу және енгізудің практикалық тәсілдерін талқылау және кәсіби тәжірибе алмасу форматында жұмыс кездесуін өткізді.

Іс-шара Еуропалық Одақтың «Орталық Азиядағы білікті жастар үшін диалог және іс-қимыл» (DARYA) өңірлік жобасы аясында халықаралық сарапшылардың, Кәсіптік біліктілік жөніндегі ұлттық органның, мемлекеттік органдардың, кәсіптік біліктілік жөніндегі салалық кеңестердің, сондай-ақ білім беру ұйымдарының өкілдерінің қатысуымен ұйымдастырылды.

Кездесу барысында Еуропалық Одақ елдерінің тәжірибесі және микробіліктіліктерді әзірлеудің заманауи тәсілдері, оларды тану тетіктері, білім беру бағдарламаларына интеграциялау мәселелері, сондай-ақ білім беру жүйесі мен еңбек нарығының икемділігін арттырудағы микробіліктіліктердің рөлі қарастырылды.

Күн тәртібінің негізгі бөлігі Еуропалық білім беру қорының (ETF) халықаралық сарапшыларының баяндамаларына арналды:

Анатолий Гармаш - адами капиталды дамыту жөніндегі аға сарапшы (біліктілік жүйелері);

Сату Ярвинен - адами капиталды дамыту жөніндегі сарапшы;

Надежда Солодянкина - адами капиталды дамыту жөніндегі сарапшы, DARYA бағдарламасының біліктілік бағыты бойынша үйлестірушісі.

Талқылау барысында еңбек нарығының қажеттіліктері негізінде микробіліктіліктерді жобалаудың еуропалық тәсілдері, толық біліктілікке қол жеткізу үшін оларды тану және жинақтау (stacking) тетіктері, сондай-ақ микробіліктіліктердің сапасын қамтамасыз ету және олардың тізілімін жүргізу мәселелері жан-жақты қарастырылды.

Кездесу қорытындысы бойынша қатысушылар Қазақстанның Ұлттық біліктілік жүйесінің қажеттіліктерін ескере отырып, микробіліктіліктерді енгізу тетіктерін дамыту және халықаралық тәжірибені одан әрі зерделеудің маңыздылығын атап өтті.