Қазақстан Республикасының «Кәсіптік біліктілік туралы» Заңын іске асыру шеңберінде кәсіптік біліктіліктерді тану орталықтарын (бұдан әрі – КБТО) аккредиттеу тәртібі жетілдірілуде. Тиісті өзгерістер Қазақстан Республикасы Еңбек және халықты әлеуметтік қорғау министрінің 2023 жылғы 9 қыркүйектегі № 381 бұйрығына өзгерістер енгізу туралы бұйрық жобасында көзделген. Жаңа модель аккредиттеудің негізгі рәсімдерін Ұлттық біліктілік жүйесінің цифрлық платформасында (Career Enbek) электрондық форматқа көшіруді көздейді.
Цифрлық сервис заңды тұлғаларға қажетті құжаттарды қоса тіркей отырып, жеке кабинеті арқылы аккредиттеуден өтуге электрондық форматта өтінім беру, сондай-ақ рәсімнің барлық кезеңдерінде өтінімдерді қарастыру мәртебесін бақылау мүмкіндігін ұсынады.
Аккредиттеу рәсімі өтінімдерді қабылдау мен қарастыруды, Кәсіптік біліктілік жөніндегі ұлттық органның ұсынылған құжаттарды сараптаудан өткізуді, фото- және бейнетіркеуді пайдалана отырып, өтініш берушіні қашықтан тексеруді, сондай-ақ материалдарды қарау мен кәсіптік біліктіліктер жөніндегі салалық кеңес мүшелерінің дауыс беруін қамтиды.
Уәкілетті мемлекеттік органдар мен Ұлттық орган үшін өтінімдерді қарау, белгіленген талаптарға сәйкестігін тексеру, тексеру нәтижелері бойынша қорытындылар мен есептер қалыптастыру құралдары қарастырылған. Материалдарды қарау қорытындысы бойынша уәкілетті орган КБТО-ны аккредиттеу немесе аккредиттеуден бас тарту туралы шешім қабылдайды.
Оң шешім қабылданған жағдайда түпнұсқалығын тексеруге арналған бірегей сериялық нөмірі мен QR-коды бар электрондық аккредиттеу аттестаты қалыптастырылады. Аккредиттелген орталықтар, мәлімделген кәсіптер және аттестаттардың мәртебесі туралы мәліметтер Кәсіптік біліктіліктерді тану жөніндегі аккредиттелген орталықтардың электрондық тізіліміне енгізіледі.
Аккредиттеу ерікті және өтеусіз негізде жүзеге асырылады. Аккредиттеу аттестатының қолданылу мерзімі үш жылды құрайды. Аттестат алынғаннан кейін КБТО мен Кәсіптік біліктілік жөніндегі ұлттық орган арасында аккредиттеуден кейінгі шарт жасалады.
«Аккредиттеудің цифрлық тетігін енгізу рәсімнің барлық кезеңдерінің ашықтығы мен жүйелілігін қамтамасыз етуге, өтініш берушілер мен уәкілетті органдарға түсетін әкімшілік жүктемені азайтуға, орталықтардың белгіленген талаптарға сәйкестігін бағалаудың объективтілігін арттыруға, сондай-ақ аккредиттелген ұйымдарды бірыңғай цифрлық платформада орталықтандырылған есепке алуды қамтамасыз етуге мүмкіндік береді», – деп атап өтті «Еңбек ресурстарын дамыту орталығы» АҚ вице-президенті Тахир Аслялиев.
Жоба Қазақстан Республикасы Еңбек және халықты әлеуметтік қорғау министрлігі мен «Еңбек ресурстарын дамыту орталығы» АҚ қатысуымен іске асырылуда.
Ұлттық біліктілік жүйесінің цифрлық платформасының (Career Enbek) функционалын одан әрі дамыту кәсіптік біліктіліктерді тану орталықтарын аккредиттеу және қызметін бақылау процестерін жетілдіруге бағытталатын болады.
