2026 жылғы 8 қазанда «Еңбек ресурстарын дамыту орталығы» АҚ базасында Қазақстан Республикасы Құрылтайының депутаты Динара Наумованың төрағалығымен коучинг және бизнес-тренинг саласындағы кәсіби қоғамдастық өкілдерімен жұмыс кездесуі өтті.
Талқылауға кәсіби қоғамдастықтың, Қазақстан Республикасы Еңбек және халықты әлеуметтік қорғау министрлігінің және «ЕРДО» АҚ өкілдері қатысты.
Коучинг саласындағы кәсіптік стандартты қолданудың алғашқы нәтижелері туралы ICF Kazakhstan Халықаралық коучинг федерациясының вице-президенті Дана Джантемирова және ICU Қазақстан коучтер қауымдастығының президенті Галия Нурбекова баяндады.
Спикерлер практикалық кейстермен бөлісіп, мамандардың халықаралық талаптарға сәйкес білім алуға және сертификаттаудан өтуге қызығушылығы артып келе жатқанын атап өтті.
Кездесуге қатысушылар кәсіптік стандарт коучтердің құзыреттеріне бірыңғай талаптар қалыптастырып, көрсетілетін қызметтердің сапасын арттыруға және мамандыққа деген сенімді нығайтуға ықпал ететінін атап өтті.
Сондай-ақ, еңбек нарығындағы өзгерістер мен жасанды интеллектіні енгізуді ескере отырып, коучинг саласындағы кәсіптік стандартты өзектендіру қажеттілігі талқыланды. Халықаралық сертификаттары бар, аккредиттелген коучингтік ұйымдарда сертификаттаудан өткен коучтердің Тізілімін құруға ерекше назар аударылды.
Тізілім Ұлттық біліктілік жүйесінің цифрлық платформасында орналастырылады және мамандарға өз құзыреттерін растауға, ал азаматтар мен ұйымдарға білікті коучті таңдауда бағдар алуға мүмкіндік береді.
