2026 жылғы 13–14 қазанда Түрікменстанның Ашхабад қаласында Еуропалық одақтың DARYA жобасы Жоғары деңгейдегі тобының адами капиталды дамыту және Транскаспий көлік дәлізін кадрлармен қамтамасыз ету мәселелеріне арналған бесінші отырысы өтті.
Іс-шараға Қазақстан, Қырғызстан, Тәжікстан, Түрікменстан және Өзбекстан өкілдері, Еуропалық одақтың, Еуропалық білім беру қорының (ETF) және халықаралық ұйымдардың өкілдері қатысты.
Қатысушылар көлік-логистика саласы үшін мамандар даярлау, цифрлық дағдыларды дамыту, кадрларға қажеттілікті болжау және ұлттық біліктілік жүйелерін жетілдіру мәселелерін талқылады.
Қазақстан Республикасы Еңбек және халықты әлеуметтік қорғау министрлігінің атынан «Еңбек ресурстарын дамыту орталығы» АҚ басқарушы директоры Ернат Жүнісов сөз сөйледі.
Өз сөзінде ол Қазақстанның көлік саласында шамамен 870 мың адам жұмыспен қамтылғанын, ал көлік инфрақұрылымын дамыту қосымша шамамен 57 мың маманға, оның ішінде жаңа кәсіптер бойынша мамандарға қажеттілік туындататынын атап өтті.
Қазақстан еуропалық ESCO жіктеу жүйесінің үлгісі негізінде Орталық Азияның өңірлік дағдылар банкін құруды ұсынды. Ынтымақтастықты үш бағытқа шоғырландыру ұсынылды: кәсіптік талаптар мен біліктіліктерді салыстыру, мамандарды бірлесіп даярлау және біліктіліктерді тану тәсілдерін жақындастыру.
Қазақстан тарапы Ұлттық біліктілік жүйесін дамыту, кәсіптік стандарттарды жаңарту және Skills Enbek платформасын қоса алғанда, оқытуда цифрлық құралдарды пайдалану тәжірибесін де таныстырды.
«Дәліздің табыстылығы тек тасымалданған жүк тоннасымен ғана емес, оны тасымалдайтын адамдардың біліктілігімен де өлшенетін болады», – деп атап өтті Ернат Жүнісов.
Отырыс қорытындысы бойынша қатысушылар кәсіптік дағдыларды дамытуға, кадрларды бірлесіп даярлауға және Орталық Азия елдері мамандарының кәсіптік ұтқырлығын арттыруға бағытталған DARYA өңірлік жол картасын іске асыру жөніндегі алдағы қадамдарды талқылады.
Анықтама үшін: DARYA – Еуропалық одақтың Еуропалық білім беру қоры іске асыратын, кәсіптік дағдыларды дамытуға, біліктілік жүйелерін жетілдіруге және Орталық Азия елдері арасындағы ынтымақтастықты нығайтуға бағытталған өңірлік жобасы.
