• Жаңалықтар
  • Жасанды интеллект кәсіптер мен дағдыларды қалай өзгертуде: Қ...

Жасанды интеллект кәсіптер мен дағдыларды қалай өзгертуде: Қазақстанда еуропалық сарапшылардың зерттеулері талқыланды

2026 жылғы 16 қараша
Жасанды интеллект кәсіптер мен дағдыларды қалай өзгертуде: Қазақстанда еуропалық сарапшылардың зерттеулері талқыланды

2026 жылғы 9 қарашада «Еңбек ресурстарын дамыту орталығы» АҚ-ның бастамасымен Еуропалық білім беру қорымен (ЕБҚ) бірлесіп оқыту вебинары өткізілді. Вебинар барысында халықаралық сарапшылар жасанды интеллекттің (ЖИ) әсерінен еңбек нарығында орын алып жатқан өзгерістер туралы зерттеулердің нәтижелерін ұсынды.

 

Іс-шараға мемлекеттік органдардың, кәсіптік біліктіліктер жөніндегі салалық кеңестердің, техникалық және кәсіптік, орта білімнен кейінгі, жоғары және жоғары оқу орнынан кейінгі білім беру ұйымдарының, сондай-ақ басқа да мүдделі ұйымдардың 160-тан астам өкілі қатысты.

 

Еуропалық білім беру қорының сарапшылары Мирела Гавочи мен Кристиан Райляну спикер ретінде сөз сөйлеп, жасанды интеллекттің (ЖИ) жұмыспен қамтуға, кәсіптік қызмет мазмұнының өзгеруіне және жұмыскерлердің құзыреттеріне қойылатын жаңа талаптардың қалыптасуына әсері жөніндегі халықаралық зерттеулердің нәтижелерін ұсынды.

 

ЖИ-ді енгізудің еңбек функцияларын қалай өзгертетініне, қолданыстағы кәсіптердің трансформациялануына және жаңа кәсіптік дағдыларға сұраныстың артуына ерекше назар аударылды. Сарапшылар технологиялық өзгерістер жағдайында цифрлық құзыреттердің, үздіксіз оқытудың және білімді уақтылы жаңартудың маңызы артып келе жатқанын атап өтті.

 

Сонымен қатар жасанды интеллект саласындағы дағдылардың үш деңгейі жеке қарастырылды: күнделікті жұмыста ЖИ құралдарын пайдаланудың базалық дағдылары, экономиканың түрлі салаларында ЖИ шешімдерін қолдану және енгізу құзыреттері, сондай-ақ жасанды интеллект технологияларын әзірлеу және жетілдіру үшін қажетті терең ғылыми-техникалық білім.

 

Талқылау барысында қатысушылар ЕБҚ зерттеулерінің нәтижелерін Қазақстанның Ұлттық біліктілік жүйесін дамыту мақсатында пайдалану мүмкіндіктерін қарастырды. Атап айтқанда, оларды кәсіптік стандарттарды әзірлеу және өзектендіру, сұранысқа ие дағдыларды айқындау, сондай-ақ еңбек нарығының қажеттіліктерін ескере отырып, білім беру бағдарламаларын жетілдіру кезінде қолдану мәселелері талқыланды.

 

Өткізілген вебинар ЖИ-дің еңбек нарығына әсерін бағалаудың халықаралық тәсілдерімен танысуға және оларды Қазақстанда практикалық тұрғыдан қолдану мәселелерін талқылауға мүмкіндік берді.

 

ЕБҚ зерттеулерінің нәтижелері мен сарапшыларының ұсынымдары цифрлық трансформация жағдайында кәсіптік стандарттарды жаңарту, кәсіптік біліктіліктер жүйесін дамыту және жұмыскерлерге қажетті жаңа құзыреттерді қалыптастыру үшін қосымша негіз бола алады.

Навыки