15 қазанда Астанада «NEW SILK WAY» VIII халықаралық көлік-логистикалық бизнес-форумы өтті, форумның салтанатты ашылуында ҚР Премьер-Министрі Бектенов О.А. құттықтау сөз сөйледі.
Форум аясында «Трансшекаралық көлік логистикасындағы білім беру мен бизнестің синергиясы: болашақ дағдылары мен құзыреттері» тақырыбында панельдік сессия өтті. Саланы цифрландыру жағдайында жұмыс істей алатын мамандарды даярлау және сұранысқа ие құзыреттерді қалыптастыруға бизнестің қатысуы басты назарда болды.
Сессия модераторы WAY GROUP компаниясының персонал жөніндегі директоры Антон Пашков (Мәскеу қ.) болды. Пікірталасқа Қазақстан мен Ресейдің көлік-логистикалық компаниялары мен жоғары оқу орындарының өкілдері, сондай-ақ кадрлар даярлау және адам ресурстарын басқару саласындағы сарапшылар қатысты.
«Еңбек ресурстарын дамыту орталығы» АҚ бас сарапшысы Динара Сандыбаева «Логистикадағы озық оқыту: кәсіптік стандарттардың рөлі» тақырыбында баяндама жасады.
Спикер технологиялық өзгерістер білім мен дағдыларды үнемі жаңартып отыруды талап ететінін атап өтті. «Өмір бойына бір диплом» моделі үздіксіз білім алу тұжырымдамасына жол беруде. Сондықтан кадрлар даярлау барысында компаниялардың ағымдағы сұраныстарымен қатар алдағы жылдары сұранысқа ие болатын құзыреттер де ескерілуі тиіс.
Бизнес қажеттіліктері мен оқыту мазмұнын байланыстыратын буын – жұмыс берушілер білім беру саласының өкілдерімен бірлесіп әзірлейтін кәсіптік стандарттар.
Биыл көлік логистикасы саласында 75 кәсіпті қамтитын 13 кәсіптік стандарт өзектендірілді. Олар білім беру бағдарламаларын жаңартуға және мамандарды нақты өндірістік міндеттерді орындауға даярлауға негіз болады.
