Микробіліктіліктерді дамыту мәселелері жөніндегі жұмыс тобы құрылды

2026 жылғы 8 мамырда «Еңбек ресурстарын дамыту орталығы» АҚ-ның үйлестіруімен «микробіліктілік» ұғымын заңнамалық тұрғыдан бекіту бойынша ұсыныстар әзірлеу жөніндегі Жұмыс тобының алғашқы отырысы өтті.

Талқылауға кәсіптік біліктіліктер, білім беру және денсаулық сақтау салаларындағы уәкілетті органдардың өкілдері, жұмыс берушілер, кәсіптік біліктіліктер жөніндегі салалық кеңестердің мүшелері, «Атамекен» ҰКП, «Талап» КеАҚ, Жоғары білім беруді дамыту ұлттық орталығының өкілдері, сондай-ақ колледждер мен жоғары оқу орындарының басшылары қатысты.

Кездесудің негізгі мақсаты халықаралық тәжірибені ескере отырып, микробіліктіліктерді нормативтік тұрғыдан бекіту және цифрлық тізілім қалыптастыру бойынша ұсыныстар әзірлеу болды.

Отырыс барысында қатысушылар микробіліктілік ұғымының заңнамалық анықтамасының болмауы, бағдарламаларды әзірлеу кезінде кәсіптік стандарттарды қолданудағы қиындықтар, сондай-ақ жұмысқа орналастыру және біліктіліктерді тану кезінде микробіліктіліктерді есепке алу тетіктерінің жоқтығы секілді бірқатар негізгі мәселелерді талқылады.

Еңбек нарығы үшін микробіліктіліктердің практикалық маңыздылығына, сондай-ақ оларды денсаулық сақтау, энергетика, ақпараттық технологиялар және қауіпсіздік пен кәсіптік жауапкершілікке байланысты өзге де реттелетін салаларға енгізу мәселелеріне ерекше назар аударылды.

Сонымен қатар, микробіліктіліктер тізілімін қалыптастыру, бағдарламалар мониторингі және оларды мемлекеттік цифрлық жүйелермен интеграциялау мәселелері қарастырылды.

Отырыс қорытындысы бойынша қатысушылар бірлескен жұмысты жалғастыруға және микробіліктіліктерді практикалық қолдану мәселелері бойынша білім беру жүйесі мен салаларда сауалнама жүргізуге уағдаласты.

Келесі отырысқа техникалық және кәсіптік, жоғары және жоғары оқу орнынан кейінгі білім беру жүйесінде микробіліктіліктерді енгізу тәжірибесінің мысалдарын дайындау жоспарланып отыр.