2,3 мың адам өз біліктілігін арнайы орталықтарда растады
2025 жылы 2,3 мың адам Ұлттық біліктілік жүйесінің (Career Enbek) цифрлық платформасында кәсіптік біліктілікті тану рәсімінен өту мүмкіндігін пайдаланды. Аталған рәсім азаматтарға өз білімдері мен дағдыларын растауға, соның нәтижесінде еңбек нарығындағы бәсекеге қабілеттілігін арттыруға мүмкіндік береді.
Кәсіптік біліктілікті тану рәсімі әрбір азаматқа өз білімдері мен дағдыларын ресми түрде растау, еңбек нарығындағы бәсекеге қабілеттілігін арттыру және жаңа мансаптық мүмкіндіктер ашу мүмкіндігін беруге бағытталған.
Біліктілікті тану кәсіптік стандарттар негізінде жүзеге асырылады және үміткердің белгілі бір мамандық талаптарына сәйкестігін бағалауға мүмкіндік береді.
Бүгінгі таңда салалық мемлекеттік органдардың ұсыныстарын ескере отырып, Career Enbek цифрлық платформасында 749 мамандықты қамтитын Мамандықтар тізілімі қалыптастырылған: оның ішінде 134 – міндетті негізде, ал 615 – ерікті негізде.
Қазіргі уақытта 9 аккредиттелген кәсіптік біліктілікті тану орталығы жұмыс істейді. Олар тізілімге енгізілген 615 мамандықтың ішінен 63 мамандық бойынша біліктілікті тануды жүзеге асырады.
Тану рәсімі ақпараттық технологиялар, ауыл шаруашылығы, туризм, қонақжайлылық және басқа да салаларда ерікті негізде жүргізіледі.
Жұмысшы мамаңдықтар жылы аясында тану орталықтарының желісін одан әрі кеңейту бойынша белсенді жұмыс жүргізілуде.
Осы жылдың соңына дейін Eurasian Resources Group компаниясымен бірлесіп, Ақтөбе, Қостанай және Павлодар облыстарында халықаралық стандарттарға бағытталған және тиісті тану рәсімдерін енгізуді көздейтін үш орталық ашу жоспарлануда.
Сондай-ақ ірі компаниялар мен қауымдастықтармен («Allur», «Qaz Textile Industry», «Qarmet», «ҚазМұнайГаз», «ҚазАтомПром», «Қазақмыс», «Қазақтелеком», «Қазақстан Темір Жолы», KazGROW, HR сертификаттау орталығы және т.б.) бірлесіп, олардың базасында келесі салалар бойынша тану орталықтарын құру жұмыстары жүргізілуде: машина жасау, энергетика, металлургия, көлік және логистика, мұнай-газ химиясы, ауыл шаруашылығы және басқа салалар.
Жаңа орталықтардың құрылуы формальды емес және (немесе) бейресми білім алу арқылы алынған біліктілікті объективті бағалауды қамтамасыз етеді. Бұл жұмыс берушілердің, соның ішінде халықаралық стандарттардың талаптарына сәйкестікті қамтамасыз етіп, азаматтардың жаһандық еңбек нарығындағы бәсекеге қабілеттілігін арттыруға мүмкіндік береді.
Еске сала кетсек, мемлекеттік қолдау шаралары аясында жұмыссыз азаматтарға кәсіптік біліктілікті тану рәсімінен тегін өту мүмкіндігі беріледі.
Ол үшін азамат Career Enbek цифрлық платформасында өтінім беріп, Мамандықтар тізілімінен мамандық пен тиісті тану орталығын таңдауы қажет.
Оң шешім қабылданған жағдайда үміткердің жеке кабинетінде электрондық ваучер қалыптастырылады, оны 45 күнтізбелік күн ішінде пайдалану қажет.