Елімізде кәсіптік біліктілікті тануға біржолғы ваучер алуға өтінімдерді қабылдау басталды
2026 жылғы 1 қаңтардан бастап елімізде кәсіптік біліктілікті тануға біржолғы ваучер алуға өтінімдер қабылдау басталды. Бұл шара жұмыссыз азаматтарды мемлекеттік қолдау шеңберінде іске асырылады және мемлекет қаражаты есебінен кәсіптік дағдылар мен практикалық тәжірибені тегін растау мүмкіндігін қамтамасыз етуге бағытталған.
Ваучер аккредиттелген кәсіптік біліктілікті тану орталығында кәсіптік біліктілікті тану рәсімінен өту құқығын береді. Бұл шара ең алдымен еңбек қызметі, өзін-өзі оқыту немесе бейресми оқыту процесінде кәсіптік дағдыларды алған және дипломы немесе білімі туралы өзге де ресми құжаты жоқ азаматтарға бағытталған.
Ваучерді алу үшін Сareer Enbek цифрлық платформасында үміткердің жеке кабинеті арқылы электрондық өтініш беру қажет. Процедура толығымен онлайн форматта жүзеге асырылады және Кәсіптер тізілімінен мамандықты дәйекті таңдауды, кәсіптік біліктілікті танудың қолайлы орталығын анықтауды және өтінішті қарауға жіберуді қамтиды.
Өтінішті қарау қорытындысы бойынша мансап орталығы және кәсіптік біліктілікті тану орталығы өтініш берушінің жеке кабинетінде біліктілікті тану рәсімінен тегін өту құқығын беретін электрондық ваучер қалыптастырады. Ваучердің қолданылу мерзімі ол құрылған күннен бастап 45 күнтізбелік күнді құрайды.
Ваучер күнтізбелік жыл ішінде бір рет, тек бір ғана таңдалған мамандық бойынша және электрондық өтініш берген кезде өтініш беруші көрсеткен кәсіптік біліктілікті тану орталығында ғана пайдаланылуы мүмкін.
Ваучерді ресімдеу, кәсіпті немесе тану орталығын таңдау мәселелері бойынша азаматтар тұрғылықты жері бойынша мансап орталықтарына (еңбек мобильділігі орталықтарына) түсініктеме сұрай алады.