Қазақстан Республикасы Еңбек және халықты әлеуметтік қорғау министрлігі 2025 жылы салалық біліктілік жүйелерін дамыту қорытындыларын шығарып, 2026 жылға арналған басымдықтарды айқындады
2026 жылғы 5 ақпанда 2025 жылы салалық біліктілік жүйелерін дамыту қорытындылары мен 2026 жылға арналған жұмыстың басым бағыттарын айқындауға арналған мемлекеттік органдардың 60-тан астам өкілінің қатысуымен кеңес өткізілді.
Кеңес барысында 2025 жылдың қорытындысы бойынша 147 кәсіптік стандарт бекітілгені, оның ішінде 100 кәсіптік стандарт сұранысқа ие жұмысшы мамандықтары бойынша Жұмысшы мамандықтар жылы аясында әзірленгені айтылды. Сондай-ақ 13 кәсіптік біліктілікті тану орталығы құрылып, 74 кәсіп бойынша біліктіліктерді бағалау және тану қамтамасыз етілуде.
«Ұлттық біліктілік жүйесін дамыту жүйелі ведомствоаралық өзара іс-қимылды талап етеді. Тек мемлекеттік органдардың ортақ жауапкершілігі жағдайында біз кәсіптік стандарттарды уақтылы жаңартуды және адами капитал сапасын арттыруды қамтамасыз ете аламыз», — деп атап өтті Қазақстан Республикасы Еңбек және халықты әлеуметтік қорғау вице-министрі Виктория Шегай.
Ол сонысен қатар Энергетика министрлігінің, Өнеркәсіп және құрылыс министрлігінің, сондай-ақ Көлік министрлігінің салалық біліктілік жүйелерін дамыту бойынша жүйелі жұмысын ерекше атап өтті.
2026 жылға арналған негізгі басымдықтар айқындалды. Олардың қатарында кемінде 150 кәсіптік стандартты бекіту, 10 біліктілікті тану орталығын ашу, халықаралық тәжірибені ескере отырып Ұлттық кәсіптер жіктеуішін жаңарту, салалық кеңестер мен орталықтардың жұмысын автоматтандыру, сондай-ақ кәсіптік стандарттарды бағалау және дамыту бойынша заманауи құралдарды енгізу қарастырылған.
Кәсіптік стандарттарды әзірлеу тиімділігін арттыру мақсатында құжаттарды дайындау мерзімдерін қысқартуға және олардың мазмұнының сапасын арттыруға бағытталған ЖИ-негізіндегі кәсіптік стандарттар конфигураторын енгізу көзделген.
Кеңес қорытындысы бойынша Ұлттық біліктілік жүйесін тұрақты дамыту және елдің адами капиталы сапасын арттыру үшін мемлекеттік органдар мен барлық мүдделі тараптардың іс-қимылдарын одан әрі үйлестіру қажеттілігі атап өтілді.