Ұлттық кеңес біліктіліктерді дамытудың жаңа бағыттарын белгіледі
2026 жылғы 1 маусымда Қазақстан Республикасы Еңбек және халықты әлеуметтік қорғау министрі А.М. Ертаевтың төрағалығымен Кәсіптік біліктілік жөніндегі ұлттық кеңестің отырысы өтті.
Отырыс барысында 2025 жылғы салалық біліктілік жүйелерінің даму нәтижелеріне жүргізілген талдау қаралды. Талқылау қорытындысы бойынша кәсіптік стандарттардың сапасын арттыру, мемлекеттік органдардың, жұмыс берушілер мен білім беру ұйымдарының өзара іс-қимылын күшейту, сондай-ақ кәсіптік біліктілік жөніндегі салалық кеңестер қызметінің нәтижелілігін арттыру қажеттігі атап өтілді.
Алдағы кезеңге біліктіліктерді қалыптастыру тетіктерін жетілдіруге, кадрлық әлеуетті дамытуға және мамандар даярлаудың еңбек нарығы талаптарына сәйкестігін арттыруға бағытталған негізгі міндеттер айқындалды.
2026 жылы жасанды интеллекттің дамуын, экономиканы цифрландыруды, өндірістік процестерді автоматтандыруды және жаңа технологияларды енгізуді ескере отырып, 400-ден астам кәсіптік стандартты әзірлеу және өзектендіру көзделген.
«Ұлттық біліктілік жүйесі экономиканы сұранысқа ие кадрлармен қамтамасыз етудің тиімді құралына айналуы тиіс. Ол үшін кадрларға деген қажеттілікті болжау, кәсіптік стандарттар, білім беру жүйесі және жұмыс берушілер арасындағы өзара байланысты қамтамасыз ету қажет. Тек осындай тәсіл ғана біліктіліктерді уақтылы жаңартып, еңбек нарығының талаптарына сәйкес келетін мамандарды даярлауға мүмкіндік береді», – деп өз сөзінде «Еңбек ресурстарын дамыту орталығы» АҚ Президенті Ерасыл Жұманбаев атап өтті.
Мемлекеттік органдарға кадрларға деген қажеттілікті болжаудан бастап біліктіліктерді тану мен жұмысқа орналастыруға дейінгі адам капиталын дамытудың кешенді тәсілін көздейтін біліктіліктер мен дағдыларды дамытудың салалық жоспарларын әзірлеу тапсырылды.
Қабылданған шешімдер кадрларды даярлау тетіктерінің тиімділігін арттыруға және экономика салаларының тұрақты кадрлық дамуын қамтамасыз етуге бағытталған.