Астанада кадрлық әлеуетті бағалау және кәсіби дағдыларды дамыту жөніндегі оқыту семинары өтті
2025 жылғы 29 шілде мен 1 тамыз аралығында «Еңбек ресурстарын дамыту орталығы» АҚ базасында Еуропалық білім беру қорының (ЕББҚ) әдістемелік қолдауымен кадрлық әлеуеттің жай-күйін зерттеу және кәсіби дағдыларды дамытудағы басымдықтарды анықтауға арналған оқыту семинары өтті.
Семинарды еңбек нарығы бойынша халықаралық сарапшы, ЕББҚ шақырылған эксперті Ина Пичман жүргізді. Іс-шараға Еңбек ресурстарын дамыту орталығы мен кәсіби біліктілік жөніндегі салалық кеңестердің өкілдері қатысты.
Семинар бағдарламасына жұмыс берушілер арасында сауалнама жүргізу әдістемесін үйрету кіреді. Бұл сауалнамалар кадрлық әлеуеттің нақты жағдайын бағалауға және кәсіби дағдыларды дамытудағы басым бағыттарды айқындауға мүмкіндік береді. Пилоттық зерттеулер тұрғын үй-коммуналдық шаруашылығы және су ресурстары салаларында жүргізілетін болады.
Жиналған деректер еңбек нарығының өзекті қажеттіліктерін анықтауға және кәсіби дағдыларды салалық сұранысқа сай дамыту бойынша нақты ұсыныстар әзірлеуге септігін тигізеді.