Enbek.kz платформасы тау-кен металлургия саласы бойынша 2.0 нұсқадағы Жаңа мамандықтар Атласымен толықтырылады

Астана, 2025 жылғы 28 шілдеде «Еңбек ресурстарын дамыту орталығы» АҚ-ның Президенті Ерасыл Жұманбаевтың төрағалығымен Тау-кен металлургия саласы бойынша Жаңа мамандықтар Атласының 2.0 нұсқасын жаңарту және оны Enbek.kz цифрлық платформасында орналастыру мәселелері бойынша жұмыс кездесуі өтті.

Кездесуге «Тау-кен және тау-кен металлургия кәсіпорындарының республикалық қауымдастығы» ЗТБ, сондай-ақ «Мамандығым – Болашағым» жобалық офисінің жетекшісі қатысты.

Кездесу барысында Атласты қалыптастыру әдістемесін жаңарту, оны нормативтік тұрғыда бекіту және әрі қарай цифрлық интеграциялау мәселелері талқыланды.

Атласты Enbek.kz платформасында техникалық тұрғыдан орналастыру, сондай-ақ оны Skills.enbek.kz, Career.enbek.kz сияқты басқа да цифрлық сервистермен интеграциялау - Атласты кәсіби бағдар, оқыту және біліктілікті тану жүйесінде кеңінен қолдануға мүмкіндік беретін негізгі бағыт ретінде айқындалды.

Сонымен қатар, Атласта көрсетілген жаңа мамандықтарды Ұлттық кәсіптер жіктеуішіне енгізу жөніндегі ұсыныстар қаралды. Бұл жаңартылған Атласты білім беру, жұмыспен қамту және кадрлар даярлау жүйесінде болжам жасау мен жоспарлау құралы ретінде пайдалануға мүмкіндік береді.