Панельдік сессия: «Жұмысшы мамандықтар жылы: Көлік саласын дамытудың негізгі ресурсы – кадрлар»

Астанадағы EXPO халықаралық көрме орталығында Орталық Азиядағы көлік пен құрылыс техникасына арналған ең ірі салалық алаң – Komtrans Astana + BUSexpo Astana және Eurasian Construction Technology Astana 2025 көрмелері өз жұмысын жалғастыруда. Іс-шараға Қазақстан, Қытай, Түркия және Өзбекстаннан келген 230 компания қатысып, инновациялық өнімдері мен салалық шешімдерін ұсынуда.

Көрменің іскерлік бағдарламасы аясында «Жұмысшы мамандықтар жылы: Көлік саласын дамытудың негізгі ресурсы – кадрлар» атты панельдік сессия өтті. Сессияда көлік-логистика саласына қажетті білікті мамандарды даярлау бойынша өзекті мәселелер мен шешу жолдары талқыланды.

Сессия барысында «Еңбек ресурстарын дамыту орталығы» АҚ атынан Ернат Жүнісов негізгі баяндама жасап:

«Цифрландыру, автоматтандыру және жасанды интеллект еңбек нарығын түбегейлі өзгертіп жатыр. 2035 жылға қарай көлік саласына 117 мыңнан астам маман қажет болады. Қазірдің өзінде біз практикалық дағдыларды қажет ететін — логистер, жүргізушілер, қойма операторлары, механиктер секілді жұмысшы кадрлардың тапшылығын байқап отырмыз»- деп атап өтті

Оның айтуынша, салада 670 мыңға жуық адам жұмыс істейді, олардың жартысынан астамы – техникалық және кәсіптік білімі бар мамандар. Алайда жастардың үлесі әлі де төмен.

«Жастар арасында салалық мамандықтарға деген қызығушылықты арттырып, заманауи кәсіптік стандарттарға, цифрлық дағдылар мен микробіліктіліктерге негізделген білім беру траекторияларын қалыптастыру қажет», – деді спикер.

Сессия қатысушыларының ортақ пікіріне сәйкес, жүйелі кадр дайындаусыз көлік индустриясы транзиттік саясатты да, логистикалық тізбектерді цифрландыруды да толық жүзеге асыра алмайды. Дәл осы жұмысшы мамандықтар саланың тұрақты дамуының іргетасы болып отыр.