Кәсіптік бағдарды дамыту жұмыстары бойынша жұмыс тобы цифрлық экожүйені дамыту мәселелерін талқылады
2025 жылғы 20 маусымда «Еңбек ресурстарын дамыту орталығы» АҚ (ЕРДО) 2025 - Жұмысшы мамандар жылын іске асыру шеңберінде кәсіптік бағдарды дамыту жұмыстары мәселелері жөніндегі ведомствоаралық жұмыс тобының отырысын өткізді.
Жұмыс тобының негізгі міндеті-қазіргі заманғы технологиялар мен еңбек нарығының нақты қажеттіліктеріне бағдарланған кәсіптік бағдарлаудың бірыңғай цифрлық архитектурасын әзірлеу жөнінде ұсыныстар қалыптастыру.
Отырыс жұмысына бейінді министрліктердің, білім беру ұйымдарының өкілдері, сондай-ақ кәсіптік бағдар беру саласындағы тәуелсіз сарапшылар қатысты.
«Мансап компасы» платформасы негізінде кәсіптік бағдарлаудың бірыңғай цифрлық экожүйесін дамыту мәселелеріне басты назар аударылды. Атап айтқанда, 2025 жылдың соңына дейін платформада 100 000 оқушыны қамтудың негізгі тиімділік көрсеткішіне (KPI) қол жеткізу бойынша жоспар-кестені әзірлеу және бекіту талқыланды.
Сондай-ақ, платформаның функционалдық мүмкіндіктерін кеңейту, соның ішінде бейне нұсқаулықтар мен әдістемелік материалдарды орналастыру, мектептегі кәсіптік бағдар берушілерді оқытуды ұйымдастыру, білім беру саласындағы ақпараттық жүйелермен интеграциялау, жұмыссыздардың цифрлық бейінін және пайдаланушыларды қолдаудың басқа да құралдарын құру мәселелері қаралды.
Кездесу қорытындысы бойынша кәсіптік бағдарлаудың цифрлық құралдарын дамыту және осы бағыттағы ведомствоаралық өзара іс-қимылды күшейту бойынша жүйелі жұмысты жалғастыру туралы шешім қабылданды.