Қазақстанда кәсіптік біліктілікті танудың 5 орталығы ашылды

2026 жылы Ұлттық біліктілік жүйесін дамыту шеңберінде кәсіптік біліктілікті танудың 5 орталығы аккредиттелді және жұмысқа кірісті.

Орталықтар «ERG Сервистік орталығы» ЖШС, «ПромКвалБиОТ» ЖШС, «KazQ-Center GKH» ЖШС, «KazGrow» қауымдастығы және «KT Cloud Lab» ЖШС негізінде құрылды. Олар экономиканың негізгі секторларында біліктілікті тәуелсіз бағалауды қамтамасыз етеді:

- Өнеркәсіп, дәнекерлеу мамандықтары, тау-кен кәсіптері, мамандандырылған техниканы басқару бағыттары бойынша;

- Еңбекті қорғау, кәсіпорындардағы қауіпсіздік мәдениетін арттыруға бағытталған қызмет бойынша;

- Тұрғын үй-коммуналдық шаруашылық, тұрғын үй және тұрғын емес ғимараттарды басқару жөніндегі менеджер кәсібі бойынша;

- Агроөнеркәсіптік кешен, егіншілерден бастап мал шаруашылығы мамандарына дейінгі кең ауқымды қамтитын ауыл шаруашылығы кәсіптері бойынша;

- Телекоммуникация және байланыс орталықтары, IT-сала мамандарын сертификаттауды қамтамасыз ететін бағыттар бойынша.

Бағалау кәсіптік стандарттар негізінде жүргізіледі және мамандардың салалардың белгіленген талаптарына сәйкестігін растауға бағытталған. Бұл тәжірибені енгізу еңбек нарығындағы құзыреттерді бағалаудың бірыңғай және ашық тәсілін қамтамасыз етеді.

Орталықтардың жұмыс істеуі жұмыс берушілерге кадрларды іріктеу және дамыту кезінде жұмыскерлердің біліктілігі туралы объективті ақпарат алуға, ал мамандарға - кәсіптік деңгейін растауға, бәсекеге қабілеттілігі мен мобильділігін арттыруға мүмкіндік береді.

Жаңа орталықтардың ашылуы - адам капиталын дамытуға, кадрларды даярлау сапасын арттыруға және экономиканы білікті мамандармен қамтамасыз етуге бағытталған мемлекеттік саясатты іске асырудың жүйелі кезеңі болып табылады.