Қазақстан коучтерінің алғашқы практикалық конференциясында «Коучинг қызметі (коуч)» кәсіптік стандарты талқыланды

      2026 жылғы 12 ақпанда Астана қаласында коучинг қызметтері нарығын дамытуға мүдделі бизнес-қоғамдастықтың ұйымдастыруымен Қазақстан коучтерінің алғашқы практикалық COACHING IMPACT KAZAKHSTAN 2026 конференциясы өтті.
       Конференцияға коучтер қауымдастықтарының, коучинг мектептерінің өкілдері, жеке коучтер мен бизнес-тренерлер қатысты.
       Спикер ретінде Қазақстан Республикасы Парламенті Сенаты мен Мәжілісінің депутаттары, халықаралық қауымдастықтардың өкілдері, коучинг саласындағы сарапшы-методологтар, сондай-ақ танымал медиа тұлғаларды қоса алғанда, 10-нан астам қатысушы шақырылды.
       Талқылаудың негізгі тақырыбы «Коучинг қызметі (Коуч)» кәсіптік стандарты болды. Бұл стандарт «Еңбек ресурстарын дамыту орталығы» АҚ-ның консультациялық және әдіснамалық қолдауымен әзірленген. Конференцияға сондай-ақ «Еңбек ресурстарын дамыту орталығы» АҚ Біліктілік жүйелерін үйлестіру және тану департаментінің директоры Жанкарина А.Т. қатысты.
       Іс-шара барысында қатысушылар кәсіптік стандарттың сапаға қойылатын бірыңғай талаптарды айқындайтын, нарық қатысушыларының жауапкершілігін арттыратын және клиенттер, жұмыс берушілер мен кәсіптік қауымдастық арасындағы өзара іс-қимылдың ашық қағидаларын қалыптастыратын жүйелі құрал ретіндегі рөлін талқылады.
       «Бүгін коучингті консалтингтен, психологиядан, менторингтен және бизнес-тренерліктен нақты ажырата білу маңызды. Кәсіптік стандарт осы шекараны айқындап қана қоймай, сонымен бірге дайындыққа, тәжірибеге және этикаға қойылатын талаптарды белгілейді – бұлсыз кәсіптің тұрақты дамуы мүмкін емес», – деп атап өтті Жанкарина А.Т.
       Іс-шара қорытындысы бойынша қатысушылар Қазақстанда тұрақты, ашық және кәсіптік коучинг экожүйесін дамытуға ортақ мақсат бар екенін растады.