Қазақстанда экономиканың нақты қажеттіліктеріне, жұмыс берушілердің сұранысына және технологиялық өзгерістерге бағдарланған заманауи салалық біліктілік жүйесі кезең-кезеңімен қалыптастырылып келеді.
Ең жүйелі нәтижелер мұнай-газ саласы мен тау-кен металлургия кешенінде қол жеткізілді. Бұл салаларда біліктіліктерді басқарудың толық циклі қалыптастырылған. Мұнда біліктілік жүйесі кадрларға деген қажеттілікті болжаудан бастап мамандарды даярлау және олардың біліктілігін тануға дейінгі барлық кезеңді қамтып, адами капиталды дамытуға тікелей ықпал етеді.
Мұнай-газ саласында KAZENERGY, «ҚазМұнайГаз», ТШО, NCOC, KPO және басқа да компаниялар кәсіптік стандарттарды әзірлеуге қатысады. APEC PetroTechnic жоғары колледжі мен Атырау мұнай және газ университеті білім беру бағдарламаларын кәсіпорындардың сұранысына сәйкес бейімдейді. Еңбек нарығында сұранысқа ие кәсіптер Кәсіптер тізіліміне енгізіледі. Сонымен қатар, OPITO және NCCER халықаралық сертификаттау жүйелері қолданылады.
Тау-кен металлургия кешенінде ERG, Qarmet, «Қазақмыс», KAZ Minerals және «Қазцинк» әлемдік жабдық өндірушілер – Caterpillar, Komatsu және Sandvik компанияларының тәсілдерін ескере отырып, салалық талаптарды қалыптастырады. Бейінді колледждер мен жоғары оқу орындары кәсіпорындардың қажеттіліктеріне сәйкес кадрлар даярлайды, ал ERG базасында біліктілікті тану жөніндегі екі орталық жұмыс істейді.
Мұнай-газ саласы мен тау-кен металлургия кешенінің тәжірибесі экономиканың басқа салаларында біліктілік жүйелерін дамытуға негіз болады. Осы мақсатта 2027–2029 жылдарға арналған салалық біліктілік пен дағдыларды дамыту жоспарлары әзірленеді. Олар кадрларға деген қажеттілікті болжауды, кәсіптік стандарттарды әзірлеуді, білім беру бағдарламаларын жаңартуды, мемлекеттік білім беру тапсырысын қалыптастыруды, біліктіліктерді тануды және жұмысқа орналастыруды қамтитын толық циклді қамтиды.