2026 жылғы 25 маусымда «Еңбек ресурстарын дамыту орталығы» АҚ (ЕРДО) Ұлттық біліктілік жүйесін (ҰБЖ) дамыту мәселелері бойынша кезекті ай сайынғы оқыту семинарын өткізді. Іс-шара онлайн форматта өтіп, оған шамамен 40 қатысушы қатысты.
Семинар барысында біліктілік жүйесін дамытудың өзекті мәселелері бойынша баяндамалар ұсынылды. Кәсіптік дағдыларға деген қажеттілікті болжау құралдарына ерекше назар аударылды. «Шаңырақ» тұрғын үй саласындағы сервис пен энергосервисті басқару субъектілерінің қауымдастығы» ЗТББ жобалар жетекшісі Бақыт Ракишева Еуропалық білім беру қорының DARYA жобасы аясында тұрғын үй-коммуналдық шаруашылық кәсіпорындары арасында жүргізілген зерттеу тәжірибесімен бөлісті. Зерттеу сала қызметкерлері үшін ең сұранысқа ие құзыреттер мен қажетті дағдыларды айқындауға бағытталған.
Сонымен қатар, ЕРДО Біліктілік жүйелерін үйлестіру және тану департаментінің бас сарапшысы Ерлан Мұқашев Кәсіптер тізілімін өзектендіру жөнінде ақпарат ұсынып, оның кәсіптік біліктілікті тану рәсімінен өту кезінде қолданылатын негізгі құралдардың бірі ретіндегі маңыздылығын атап өтті.
ЕРДО өткізетін ай сайынғы оқыту семинарлары кәсіптік диалогты нығайтуға, мүдделі тараптардың хабардарлығын арттыруға және ҰБЖ тетіктерін жетілдіруге ықпал етеді.