Халықаралық сертификаттар базасын және сертификаттау саласындағы бірлескен сандық өнімдерді интеграциялау болашақтағы мүмкіндіктері
2024 жылдың 27-тамыз күні Еңбек ресурстарын дамыту орталығы мен Pearson халықаралық білім беру компаниясының өкілдері арасында онлайн кездесу өтті.
Pearson әлемнің 80-нен астам елінде еңбек ресурстарын дамытуға көмектесіп, білім беру және сертификаттау саласында заманауи шешімдерді ұсынып келеді.
Кездесу барысында тараптар өз қызметі туралы ақпарат алмасып, болашақ ынтымақтастық мүмкіндіктерін талқылады.
Әлемдегі ең ірі білім беру әдістемелерін шығарушылардың бірі, сондай-ақ мамандарды оқыту және сертификаттау саласындағы көшбасшы Pearson компаниясы Қазақстанмен ынтымақтастық орнатуға дайын екенін білдірді.
Өз кезегінде Еңбек ресурстарын дамыту орталығы еліміздегі мамандардың халықаралық сертификатқа қол жеткізуіне жағдай жасап, жаңа мансаптық мүмкіндіктер ашпақ.
Талқылау барысында бірлескен жобалар құру, біліктіліктер туралы мәліметтер алмасу, сондай-ақ Career Enbek және Credly by Pearson цифрлық өнімдерін интеграциялау сияқты әртүрлі ынтымақтастық нұсқалары қарастырылды.
Кездесу соңында ынтымақтастықтың маңыздылығын екі тарап растап, нақты іс-қимыл жоспары мен жол картасын әзірлеу үшін келіссөздерді жалғастыруға ниет білдірді.
Бұл кездесу халықаралық ынтымақтастықты нығайту және елімізде кәсіби біліктілікті сертификаттау жүйесін дамыту жолындағы алғашқы қадам. Pearson компаниясымен серіктестік қазақстандықтарға жұмыспен қамту саласында жаңа мүмкіндіктер ашып, олардың жаһандық еңбек нарығындағы бәсекеге қабілеттілігін арттырады.